Newyddion Cyngor Sir Caerfyrddin

04 Tach 2025

Cyngor Sir Caerfyrddin yn rhybuddio trigolion am fasnachwyr twyllodrus sy'n targedu cymunedau lleol

Carmarthenshire County Council warns residents about rogue traders targeting local community

Mae Cyngor Sir Caerfyrddin yn annog trigolion i fod yn wyliadwrus yn dilyn cynnydd diweddar yn nifer y bobl sy'n galw heb wahoddiad yn cynnig gwasanaethau tirweddu a gwaith toi. Mae rhai trigolion wedi talu symiau mawr am waith oedd naill ai ddim wedi'i gwblhau neu am waith oedd o safon wael iawn.

Mae Cyngor Sir Caerfyrddin yn cyhoeddi nodyn atgoffa am yr arwyddion rhybuddio o ran masnachwyr twyllodrus ac yn darparu cyngor i helpu trigolion i amddiffyn eu hunain rhag yr arferion anonest hyn.

Mae'r arwyddion rhybuddio cyffredin o ran masnachwyr twyllodrus yn cynnwys:

  • Galw yn eich cartref heb wahoddiad.
  • Defnyddio tactegau sy'n rhoi cryn bwysau arnoch chi a'ch annog i ddechrau gwaith ar unwaith neu honni bod angen atgyweiriadau brys.
  • Dim unrhyw waith papur ysgrifenedig yn cael ei ddarparu, fel amcangyfrifon neu gontractau.
  • Mynnu bod taliadau mawr yn cael eu talu ymlaen llaw.
  • Taliadau ychwanegol ar ôl i'r gwaith ddechrau, neu godi llawer gormod.
  • Gwaith sy'n cael ei gyflawni'n wael neu'n ddiangen.

Mae'r Cyngor yn annog trigolion i wneud y canlynol:

  • Sicrhewch eich bod bob amser yn cael o leiaf dri dyfynbris i gymharu prisiau cyn ymrwymo i unwaith waith.
  • Peidiwch â thalu'r swm llawn hyd nes bod yr holl waith wedi'i gwblhau i safon foddhaol. Dylech osgoi talu mewn arian parod lle bo'n bosibl.
  • Sicrhewch eich bod yn cael holl fanylion y gwaith yn ysgrifenedig.
  • Cymerwch eich amser a pheidiwch â gadael i rywun eich rhuthro i wneud penderfyniadau.
  • Os ydych chi'n llofnodi contract yn eich cartref, efallai y bydd gennych chi hawl i gyfnod ailfeddwl o 14 diwrnod.
  • Ystyriwch ddefnyddio cynllun Prynu â Hyder (BWC) y Cyngor i ddod o hyd i fasnachwyr dibynadwy.
  • Rhowch wybod am unrhyw bryderon neu weithgarwch amheus i wasanaeth Cyngor ar Bopeth i ddefnyddwyr.

Dywedodd y Cynghorydd Aled Vaughan Owen, Aelod Cabinet Cyngor Sir Caerfyrddin sy'n gyfrifol am Faterion Defnyddwyr a Busnes:

"Rydyn ni am sicrhau bod ein trigolion yn gwbl ymwybodol o'r risgiau sy'n gysylltiedig â masnachwyr twyllodrus a'u bod yn meddu ar y wybodaeth i amddiffyn eu hunain. Os yw pobl yn galw gyda chi heb wahoddiad neu os oes gennych chi bryderon am waith sy'n cael ei wneud ar eich eiddo, cysylltwch â ni neu'r gwasanaeth Cyngor ar Bopeth ar unwaith."

Mae trigolion yn cael eu hannog i fod yn effro ac i rannu'r wybodaeth hon â theulu, ffrindiau a chymdogion.

Gwybodaeth Gyswllt

Cyngor Sir Caerfyrddin | Carmarthenshire County Council
pressoffice@carmarthenshire.gov.uk